Ke shkathtësi? Je papunë?

Atëherë, Panairi i Punës është mundësi e shkëlqyer për ty. Jo vetëm do të kontaktosh me shumë punëdhënës, por mund të intervistohesh e madje, të punësohesh menjëherë. Ia vlen ta provosh!

Disa këshilla për sukses:

  1. Planifiko! Informohu cilat kompani marrin pjesë në panair, përcakto çfarë pune kërkon dhe me kë duhet të bisedosh. Punëdhënësi vlerëson kandidatin që ka njohuri për kompaninë e tij.
  2. Përshtypja e parë! Që të biesh në sy në mesin e qindra punëkërkuesve të tjerë, veshja duhet të jetë profesionale dhe në përputhje me punën që kërkon. Mbaje në mend: Mirësjellja vlerësohet. Përshëndete punëdhënësin, shihe personin tjetër në sy, buzëqesh dhe zgjate dorën me vetëbesim.
  3. Bëje një strategji! Së pari, vizito kompanitë që të interesojnë më shumë: dita sapo ka filluar dhe ke më shumë energji dhe fokus. Shfaq interesim dhe synime të qarta për vendin e punës. Vëzhgo të tjerët si veprojnë dhe cilët punëdhënës duken më aktivë. Mbaje në mend: Iniciativa vlerësohet nga punëdhënësi prandaj mos ngurro, afrohu dhe prezanto veten.
  4. Merr mjete ndihmëse! Merr me vete një bllok dhe një laps për të mbajtur shënime të dobishme: përshtypjet nga intervistat, me kë je takuar, kontaktet e tyre. Mbaje në mend: Punëdhënësi e vlerëson një kandidat të përgatitur mirë.
  5. Prezantohu! Përgatit një prezantim 1-2 minuta për shkollimin, shkathtësitë tuaja profesionale apo përvojën e punës. Merr me vete së paku 10 kopje të CV-së, nëse ke përvojë merr me vete letrat e referencës, apo mostra të produkteve apo krijimeve tua. Mbaje në mend: Shfrytëzoje kohën sa më mirë. Punëdhënësi kërkon njerëz efikasë!
  6. Bëjë pyetje! Përgatit disa pyetje për punëdhënësin potencial dhe përgatitu t’u përgjigjesh pyetjeve të tyre. Mos pyet për pagën apo beneficionet që në intervistën e parë; çdo gjë ka kohën e vet. Mbaje në mend: Punëdhënësi e vlerëson një kandidat që interesohet për pozitën e punës dhe objektivat e kompanisë, e jo një kandidat që kërkon vetëm të marrë një pagë.
  7. Krijo rrjetin! Panairi i Punës është mundësi e shkëlqyer për të zgjeruar rrjetin e njohjeve me punëdhënës, por dhe punëkërkues të tjerë. Mbaje në Mend: Edhe nëse nuk ke gjetur punëdhënësin e duhur, Panairi i Punës është hap fillestar drejt karrierës dhe një rast shumë i mirë për të testuar veten.

Suksese nga YesKosovo!